|
Willie en Enid Smith, oud-Kapenaars wat nou
sowat twee jaar in Rustenburg is, het sowat drie maande gelede die trotse
eienaars van Koedoe Meat Market geword en onmiddellik besluit dat Koedoe
die allerbeste eenstop-slaghuis in die stad moet word! En dit is ook
presies hier waar Koedoe homself van ander slaghuise in Rustenburg
onderskei - hier koop ‘n mens nie net vleis nie, maar kan jy sommer ook
na werk inloer om die week se kruideniersware teen die mees bekostigbare
pryse aan te skaf!
Seekos en vis is Koedoe se ander
spesialiteit en hier kan jy vanaf Angelvis, tot Steenbras en Kabeljou kry
vir Saterdagaand se braaivleisvuur, tot koningsgrootte garnale, mossels en
seekosmengsel vir daardie spoggerige onthaal.
Buiten vleis en seekos, die allerlekkerste
biltong en chillibites, droëwors en kruideniersware, bied Koedoe ook vars
groente en vrugte - Willie koop twee keer per week van die mark af aan -
koeldranke, gebak en hul spesialiteit - kraakvars bevrore groente.
Die Smith-egpaar se twee kleingoed, Voné
(9) en Marius (6) is al goed gekonfyt in die slaghuis-lewe en kuier
dikwels saam met ma en pa - die Smiths glo aan uitstaande diens en is van
7 uur soggens tot saans 7 uur oop sodat persone wat tot 5 uur werk, na
werk gou vir inkopies kan kom inloer. Op Saterdae maak hul eers 3 uur toe
en Sondae is hul oop van nege tot een.
Hul drome vir die toekoms rondom Koedoe
Meat Market? Nie om die grootste slaghuis in Rustenburg te wees nie, ook
nie om nog slaghuise in omliggende dorpe te besit nie, maar BESLIS om die
heel beste slaghuis in die stad te wees met die heel gelukkigste
Rustenburgse kliënte!
Maak gerus ‘n draai - jy sal weer en weer
en weer teruggaan |
